Проєкт Карпатски паралели

РУСКИ КЕРЕСТУР/СРБОБРАН – Треца часц интеркултуралного проєкту за младих „Карпатски паралели” всоботу и вчера 25. и 26. фебруара отримана у штреднїх школох у Руским Керестуре и Србобрану и з тим закончена його практична часц.

Всоботу 20 учашнїки у проєкту – ґимназиялци з румунскей заєднїци з Вершцу, словацкей з Ковачици, сербскей зоз Србобрану и домашнї з рускей националней заєднїци пребували у керестурскей Школи „Петро Кузмяк”, дзе ше блїжей упознали з руску заєднїцу, Керестуром и домашню Школу, а потим мали интерактивни роботнї.

Учашнїкох привитала сотруднїца на проєкту Мария Перкович, а у мено домашнїх директорка Школи „Петро Кузмяк” Хелена Пашо Павлович и Националного совиту Руснацох предсидатель Вивершного одбору Желько Ковач.

Часц рускей култури представела Дзивоцка шпивацка ґрупа Дому култури, з музичним провадзеньом Жарка Остоїча и Павла Раца, хтора виведли два руски народни шпиванки, а Кристина Афич и спомнити музичаре и свою авторску забавну композицию по руски.

През видео-презентацию, хтору пририхтали домашнї школяре зоз свою менторку Любицу Няради, представена руска национална заєднїца, Руски Керестур и його главни манифестациї, институциї и здруженя. Учашнїки проєкту познєйше нащивели и Катедралну церкву св. о. Миколая и музейну збирку у Замку.

Тиж всоботу, учашнїком у проєкту заєднїцу векшинского народу зоз Србобрану, як и саме место, прейґ видео-презентациї представели учашнїки-школяре Ґимназиї и економскей школи „Светозар Милетич” и їх менторка з того места. Вчера шицки учашнїки и нащивели Србобран и його знаменїтосци.

Роботнї у керестурскей Школи, з темами „Цо можем пременїц у моєй заєднїци и як” и „Моя заєднїца у 2030. року” водзела координаторка у проєкту Таня Лазор Обрадович, а у Србобрану интерактивну роботню з тему „Як видзим себе у будучносци як припаднїка националней заєднїци” отримала Єлена Перкович.

Проєкт „Карпатски паралели” финансийно потримал Фонд за отворене дружтво, а реализовал го Завод за културу войводянских Руснацох, зоз сотруднїцами, як пилот-проєкт за можлїве орґанизованє будуцих подобних проєктох.

Карпатски паралели Руски Керестур

Kарпатски паралели Србобран